红皮赤壮话乳猪

原标题：红皮赤壮话乳猪

白 话广州

◎阿六 律师

新闻讲：清明将至，记者在广州走访发现，今年乳猪价格有所下降。

阿六讲：清明祭祖各处乡村各处例，广州同外地最唔同嘅“例”，就系拜山要有乳猪。

乳猪系粤菜中一个名菜，喺平时“请饮”当中，好多人对于酒席抵唔抵食，系以有冇乳猪做评判嘅——呢个系讲招呼“生人”嘅。咁点解拜先人都用乳猪呢？因为乳猪外观金黄，色泽鲜艳，油水充足，有“红皮赤壮”之称，代表大吉大利，用佢拜先人，望嘅就系先人保佑后人吉祥。

乳猪分光皮同麻皮两种，拜山多数系用麻皮，并且要成只嘅，即“乳猪全体”，代表后人全部到齐拜祭。

拜山祭品好多，有啲人家要有鸡、鸭，连埋乳猪俗称“三牲”，有啲人家要有糕点、水果，连埋乳猪俗称“三宝”，不过，无论乜嘢祭品，拜祭时摆放都系：左鸡（或其他）、右鸭（或其他）、中乳猪——“地位”最高始终都系“红皮赤壮”。

点香烛、烧纸钱，奠烧酒、烧炮仗，搞掂？未得！

广州人拜山有个“收尾”仪式，就系俗语讲嘅“太公分猪肉”——将乳猪斩开，每个家庭分一份拎番屋企同清明荞菜炒咗食，代表先人嘅保佑“落实”到每个家庭。至此，今年嘅拜山先至正式结束。

今年乳猪价降当然好，因为“上”“下”都会讲“抵食”。