“口水尾”你食唔食

原标题：“口水尾”你食唔食

正字正音

□ 朱芳樗

有一句话，广府人成日听人讲，叫“食咗边个口水尾，就一世听佢话”。口水就系唾沫，口水尾嘅“尾”，喺粤语六声入边系阴平声，一般都写作“尾”，同“尾巴”嘅尾同声唔同调。喺其他词语中，“尾”也从来唔读平声，如“床尾”，语音流变也系作阴上声。

噉“口水尾”嘅“尾”点解又会读作阴平嘅呢？

因为呢个字本来就唔系“尾”，而是“沬”。注意喇，这个“沬”字右边是“未来”嘅“未”，唔系“末尾”嘅“末”。上网络搜一搜，“口水沬”呢个词就不单止系我哋广府人咁讲喇，东西南北方言都有呢个词，不过好似就得我哋经常讲“食人口水沬”。

噉个“沬”字又作何解呢？查下字典先。《说文解字注》：“沬，洒面也。律历志引顾命曰：王乃洮沬水。师古曰：沬，洗面也。”呢个字，古人讲就系洗面嘅意思。点读呢？“未声”。有一个词“沬血”，呢个词从字面上嚟睇，就系以血洗面，形容血流满面嘅意思。《文选·司马迁〈报任少卿书〉》：“然陵一呼劳军，士无不起，躬自流涕，沬血饮泣，更张空拳，冒白刃，北向争死敌者。”对于呢个“沬”字嘅本义，后人都搞唔清楚嘞，于是有学者李善解释呢段话嘅时候，注释了“沬”字：“言流血在面如盥颒也。”盥颒，亦都系洗面噉解。

沬字喺“口水沬”同“沬血”里面，意思系一样口架，都系洗面。噉一解释，“口水沬”就好理解嘞，口水乱喷，多到可以洗面，噉你都乖乖听话(所谓食得落是也)，系咪“一世听佢话”啊喇？