再讲讲“十下十下”

原标题：再讲讲“十下十下”

争鸣回音

□ 司徒笨笨

冼先生话“十下十下”嘅来由同粗口有关(见5月22日本版)，小弟于是揾咗彭志铭先生研究香港粗口文化嘅著作《小狗懒擦鞋》嚟拜读一番，当中果然有“十下十下”来由嘅探讨。

彭先生认为，“十下十下”嘅来由可能有两个。

第一，系同粤粗“笨七”有关。“七”喺呢度系嘅借音字，正写应该系“上山下十”，近似于“屮”，但低下多咗一横(香港特区政府发布的《增补字符集》中则写做“外門内七”)。呢个字嘅本意系男性生殖器官，系粤粗五个常用字之一。粤粗当中，笨“七”系话一个人蠢笨愚钝。由笨“七”派生出嚟嘅“七”下“七”下则有加重语气嘅功效。彭先生认为，“七”下“七”下之所以变成“十下十下”并且得到流行，当中有影星张卫健嘅贡献。皆因当年佢主演三色台电视剧《龙兄鼠弟》(三色台1993年嘅台庆剧，由万梓良、张卫健主演)嗰阵，为咗逃避广播电视管理局对粗言秽语嘅管制，刻意将啲粤粗用谐音、变调嘅方式讲出嚟。“十下十下”就系噉样问世并且成为坊间潮语！后尾有啲香港人发现“十下十下”唔系噉文雅，于是又改音讲成“七下七下”，“七”喺呢度就发翻正音啦！

第二个来由同粤俗“霎憨”有关。“霎憨”系指一个人讲嘢、做事唔经大脑，蠢蠢笨笨。由“霎憨”派生出“霎下霎下”同“憨下憨下”，意思冇咩变化，就系加强咗语气。呢度嘅“霎下霎下”同小弟认为嘅“煠下煠下”一样，可能都系变音嘅原因畀人讲成咗“十下十下”。

两个来由，噉边嗰先系正宗呢？彭先生冇畀出答案，相反佢将呢个问题留畀咗读者。其实我哋嘅探讨亦未必真系要揾出一个标准答案，只不过系喺呢个过程当中领略同体会广州话嘅巧妙之处。如果你认为“十下十下”系由来自粗口，噉大可保持自己文雅嘅形象，以后绝口不提；但如果你觉得佢同粗口无关，噉以后不妨继续“十下十下”啦！