海珠南“揾食”

原标题：海珠南“揾食”

食在广州

□ 王小满

十年前我实习期间住喺大新路，转过路口就系海珠南路。经常到晚黑收工，饭堂就剩低啲餸头餸尾，油水多肉少，唯有行到海珠南街市买个扇骨或者福寿鱼煲粥食。上完夜班，喺饭堂买碗龟苓膏出嚟，都会行到街市侧边早餐档买两个包。

街市喺二楼，干干净净，地上冇湿水，就算系喺鱼档前都唔觉有几腥。一条手掌大细嘅福寿鱼两蚊鸡有找，个头细啲嘅扇骨有阵时仲唔使一蚊，对于我哋呢滴冇粮出又冇补贴嘅实习生嚟讲，两三蚊可以搞定一餐，唔使讲有几实惠喇。经常帮衬，档主仲会帮手剐鱼，劈开骨头。靠入面有两三档卖鸡蛋杂货嘅，前面都有一排照蛋架，啲蛋新唔新鲜唔使摇照下就知。买嘢嘅人多，但个个都好守秩序，所以都唔觉逼仄。

楼下有卤味档同叉烧档，经常天都黑晒仲有十几人排队到街口，虽然未试过但应该都唔错。早餐档喺侧边，档口细到得几平方，生滚热腾腾嘅淡豆浆饮过几次，豆味香浓，同妈子用牙砵擂嘅差唔多，但就好少有渣剩。豆浆浓价钱唔平，虽然一蚊，但系对于10年前嘅我嚟讲，食个早餐两个包一杯豆浆要三蚊有啲肉赤，所以好少饮。

早餐档最受欢迎嘅莫过于糯米鸡，分量足，味道又正，只要两蚊鸡。即使要排队等足十几二十分钟、捱住眼瞓眼皮打交都要等到。糯米有咗荷叶嘅清香，别有一丝甘甜，香糯自然唔使讲，米粒软又唔油至重要。鸡系鸡翼，有骨有肉，骨唔硬唔软，皮肉就入口即化，十分鲜美。而家谂返起，仲有阵味喺嘴度。有阵时会唔小心食咗啲啲叶落去，但系唔紧要，都系食得嘅。

记忆之中，海珠南路算得上系美食一条街，傍晚时分，周边档口摆出枱凳，骑楼底下冇处可通，行人唯有落到中间马路。前几年专程坐巴士过去，食肆少咗好多，想揾返之前唔敢去食但又十分之向往、传说牛河十分之正宗嘅茶餐厅，行咗几个来回仲系冇发现。好彩早餐档冇换老板，豆浆依然好有味，糯米鸡虽然贵咗但系仲系要排队。