“百变美人”邓碧云

原标题：“百变美人”邓碧云

□ 韦倩妮

香港粤语流行乐坛有个“百变天后”梅艳芳，而香港粤剧界亦都有一位非常令人景仰嘅“百变伶人”，佢就系大家美誉为“妈打”嘅邓碧云。记得电视剧中，佢演嘅多数都系母亲嘅角色，特别是《季节》中嘅慈母最深入民心，所以获得“众人妈打”嘅美誉。而喺粤剧界中，呢位“万能旦后”，佢能文能武，能生能旦，甚至演刁蛮泼辣又或者系大家闺秀嘅角色都出神入化，演技犀利之处，无不令人赞赏。可以讲，邓碧云系粤剧历史上唯一一个能够咁多样化演出嘅演员。

我真心欣赏“妈打”邓碧云，因为佢把声线系别具一格，宁舍不同。皆因佢拥有一把独特嘅“子母喉”，令人耳仔非常享福。大家千祈唔好以为“子母喉”就系衣家大家成日讲嘅鹅公喉，“鹅公喉”系难听嘅代名词。而“子母喉”呢，就系生或旦喺唱曲时以真假声混合唱嘅表现形式。

我屋企就成日播放“妈打”嘅一只《江山美人》CD专辑，因为家中长辈总系百听不厌，就连家中细路仔都喜欢跟住节拍哼番几句，可想而知，呢位“美人”系几咁夺得大众嘅欢心。其实，邓碧云本人五官标致，即使不化妆亦绝对系一位大美人，而佢喺舞台上无论饰演小生还是花旦角色，扮相都一样俊美迷人。

《江山美人》其实改编自京剧《游龙戏凤》，都系大家非常熟悉嘅关于正德皇帝同李凤姐嘅民间传说。故事内容众所周知，就不必细说。而“妈打”就喺当中反串饰演正德皇帝，我最欣赏嘅系当中曲牌《忆秦娥》一段：

夜深深，月沉沉，兰宫寂寂灯影暗，愁心寸寸添哀感。忆爱侣苦痛倩谁陈。龙凤相分真堪悯，恨难再见心上人，一把无情剑遂尔断情根，害我相思空抱恨，都是母后心太狠。摧毁连理树，拆散有情人……“妈打”唱得如痴如醉，将呢个皇帝扮演得十分出色，演唱功架就更不容置疑。

再下一段“反线中板”主要系“皇帝”嘅伤心回忆，又系“妈打”将感情发挥到淋漓尽致嘅高潮唱段：

惆怅记当初，微服下江南，与卿相逢，梅龙镇。结下不解缘，缔成龙凤配。估道鸳梦永同温。谁料霹雳一声，震碎并头莲，帝苑难容飘零杏。空有万般情，空有千般爱……好一把声线，沧桑无奈，感慨万千，不由自主却空有余恨，仿如历历在目，却又韵味不绝，总系令人回味再三。

如果粤剧界不曾出现过邓碧云，爱慕粤剧嘅朋友就会失去好多值得回忆嘅艺术珍藏。此时此刻，我只想竖起大拇指对你讲一声，“妈打”，你系得嘅！