绿豆沙，你还记得臭草吗？

原标题：绿豆沙，你还记得臭草吗？

□ 钟雨丽

天时咁热，又系绿豆沙当旺嘅时候啦。绿豆沙香滑清甜、清热解暑，系极得人中意嘅甜品。

煲绿豆沙嘅方法有好多种，有中意加海带嘅，有中意加薏米嘅，而我哋细个食开到大最经典嘅，莫过于臭草陈皮绿豆沙。好多老一辈嘅人话，冇咗臭草嘅绿豆沙，风味全无。

时日不往，而家你想食一碗正宗嘅臭草绿豆沙，系广州都冇几家有嘞。臭草呢样嘢，买少见少，煲绿豆沙要放臭草？太麻烦啦，而家嘅人净系知道臭草可以攞来驱蚊。

臭草个学名叫芸香草，好粗生嘅，家家户户嘅阳台甚至窗台，只要摆上一只花盆，求其插一枝落去都会生到好茂盛。整绿豆糖水嘅时候，用剪刀将枝叶剪啲落来，冇几日又会茂盛如旧。芸香草被称为臭草，实系冤枉。呢种草有一种异乎寻常嘅香味，个性特立独行，有别于通常概念里面嘅“香”，呢种香始初唔叫人接受，于是人哋叫“臭草”。可以讲，芸香草系绿豆沙嘅灵魂，只放少少啫，成煲糖水就超凡脱俗，即刻零舍唔同。

喺西关，有一个关于臭草嘅传说：话说以前西关恩洲里有一个卖糖水嘅小贩，名叫阿爽。阿爽做嘅系担住副担穿街过巷卖糖水嘅营生。有一年，个老婆病，屋漏就偏逢连夜雨，生意冷落，入不敷出，阿爽就借咗大耳窿。冇耐个老婆过咗世，债主就逼上门，阿爽冇办法，拖住两个女逃到珠江西岸，对江喊一通诉一通，打算投江自尽。呢个 时 候 ，突 然 来 咗 一 个 自 称“芸香”嘅仙人，送咗一窦仙草过 阿 爽 ，同 佢 讲 ：“你 返 去 之后，用盆种好来，一日勤淋水三次，三日后就可采呢个草叶同绿豆、糖同少许陈皮一起煮，其香三里可闻。”阿爽真系就照仙人指引，真系种到窦草，加到如绿豆糖水里面，煲到一煲靓香绿豆沙，一时香传三里，人闻人喜，阿爽生意兴隆，大耳窿自然还清，日子又过得好啦。

煲绿豆沙有讲究，煲嘅时候，火太猛容易烧窿绿豆黐煲底，火力太细又难令绿豆绵溶，所以要特别注意火候分寸，要睇到绿豆壳同豆身分离浮起上来嘅时候，将豆壳捞出来，再加入臭草、陈皮，将绿豆煲到成沙为止。以前屋企煲绿豆沙，到调味嘅时候，阿嫲总系要一半白糖掺一半红糖，佢话，咁样个甜味先清香可口。

睇到呢度，你记得返臭草咩味未啊？