故衣街

原标题：故衣街

十三行嘅辉煌历史大家都听得唔少，最近新闻话，呢个鼎鼎大名嘅西关商准备搞微改造。

今次改造，有几条街成咗主角——故衣街、豆栏上街同装帽街。微改造之后，呢几条唔多出名嘅路仔以后都会变成步行街。虽然又短又窄，但系佢哋都系十三行嘅“地标”——十三行嘅范围，就系由呢几条街划出来嘅。我哋所讲嘅十三行，包括咗十三行路同杉木栏路嘅东段，仲有同佢垂直相交嘅故衣街、豆栏上街、和平东路、装帽街、长乐街同桨栏路。你话，佢哋系唔系“地标”呢。

有人听过和平东路杉木栏路，但系对故衣街装帽街就知之甚少。有人话，依家嘅十三行服装批发市场，最早就系从故衣街做起嘅。喺清代至民国期间，故衣街已经有好多出售平价宫装同旧衫嘅店铺。生活困难嘅，就将啲旧衫攞去变卖换钱；买唔起新衫嘅，就来呢度买旧衫充下场面。一来一去，故衣市场兴旺发达，就连文昌路、海珠南路一带都开咗几百个故衣档口。故衣交易成行成市，仲发展埋故衣商业同业公会添。

其实喺十三行发展起身嘅行业有好多，服装批发、船家用具、洋货商行等。即便系依家批发干货海味文具精品嘅一德路，当年亦都只不过系十三行嘅“大货仓”。呢度有全广州最早出现嘅骑楼，当时系用来上住下商嘅走货通道。你话十三行巴唔巴闭？