白鹅潭酒吧街

原标题：白鹅潭酒吧街

前两日某网约车平台搞咗个“吃货出行指南”，当中嘅“人气最旺酒吧街”统计，广州白鹅潭酒吧街居然做咗“探花”。呢个结果，真系令人大跌眼镜。

本来想喺呢条新闻里边揾多啲信息，但入边始终冇提过“白鹅潭酒吧街”点解系广州“人气最旺”。讲返起刚刚开业嘅时候，白鹅潭酒吧街的确系威水过。当时市内，佢同长堤酒吧街、滨江路酒吧街都系后生仔最中意嘅“蒲点”。而且，白鹅潭酒吧街嘅地理位置系当时酒吧街之中最好嘅。好多酒吧都有一线江景，入夜之后珠江两岸华灯璀璨景色迷人。话佢“人气旺”，一啲都唔假。

不过，呢啲都系十几年前嘅旧话喇。今时今日，前边提到嘅酒吧街都已经式微，白鹅潭酒吧街就得返一两间喺度营业，人气仲不如周边嘅食肆。我估计，所谓嘅“人气最旺”，可能系好多人通过呢个平台打车去白鹅潭酒吧街得出嘅结果。而我相信大家来呢条酒吧街嘅目的，不过系为咗去佢周边嘅食肆。芳村出咗名多嘢食，食海鲜，有滘口海宝湾水产交易市场；食顺德菜，有悦榕庄……想过河南，跨过条鹤洞桥就到；想过荔湾，过条隧道即到。白鹅潭酒吧街刚好靠近隧道口，自然有更多人来“揾食”。

白鹅潭酒吧街，依家不过系个地标。问下后生仔依家边度嘅酒吧街最旺？梗系琶醍啦。