深井烧鹅

原标题：深井烧鹅

新闻讲：“舌尖上的广州”头条指数近日发布，烧鹅力压白切鸡、凤爪成为最受关注传统美食。

阿六讲：讲到烧鹅喔，点可以少咗深井烧鹅呢。小弟今日就执执记者嘅“口水尾”，补充讲讲呢种烧鹅中嘅极品。

首先要更正一种讲法。好多街坊一讲深井烧鹅，就误为“深井”系一个地方，因为嗰度出品嘅烧鹅好食而得名。冇错，广州同香港都有深井呢个地方，唔排除呢啲地方嘅烧鹅可能都几好食。但系，深井烧鹅“深井”两个字唔系指地名嘅，佢系指制作烧鹅嘅古法工艺。呢个工艺其实就系一个烤炉，而呢个烤炉比较特殊，佢系喺地下挖出一个干井，喺下面放木炭，井口用铁枝吊住啲烧鹅嚟烧烤，所以就叫“深井”。宜家有好多大酒楼烧鹅用嘅“太空炉”其实亦系仿“深井”嘅做法。

再讲深井烧鹅最重要嘅食材——鹅。要整出好食嘅烧鹅，剩系得个“深井”系唔够嘅，所以拣乜嘢鹅好紧要。深井烧鹅嘅鹅要符合两个要求：1、唔可以太老，鹅龄最好系出世90天左右；2、唔可以太大，最好系七八斤重嘅中鹅。只有达到呢啲条件，再通过吹胀、调味、腌制、吊烧等工序，先可以整出一只色泽金红、皮脆肉嫩、美味多汁嘅靓烧鹅。

宜家市面上林林种种嘅烧鹅好多，但讲到味道喔，小弟首选深井烧鹅。