睇“色”打的士

原标题：睇“色”打的士

白话广州 ◎李月婷 媒体人

喺广州打的，我谂冇边个系未试过俾司机拒载又或者要求唔打表讲价嘅。最近广交集团班的士司机签晒承诺书，话绝对唔会出现上边提到嘅两种情况，乘客投诉嘅话仲会有奖励。

如果广交的士真系可以做到呢一点，咁大家以后出门，打“红的”就最有保障喇。相信广州嘅老街坊，大多数都可以通过唔同嘅颜色区分唔同公司嘅的士。红色嘅系广交集团嘅，黄色系广骏嘅，蓝色系白云嘅。呢三个公司，算得上系广州的士界嘅大佬。而其他颜色嘅的士，就属于一啲比较小型嘅的士公司。

不过讲返转头，以前广州啱啱兴起“扬手即停”嘅时候，嗰啲的士全部都系红色嘅。不过虽然车身颜色一样，但起跳价格同里程费就有区别。简单来讲，就系高档车贵啲，低档车平啲。当时私家车冇依家咁多，路上边嘅红色车九成都系的士。后来广州要改革的士车身颜色，当时有人反对，话大家都睇惯红色，换过另一种颜色，怕大家会唔习惯。

今日睇返，广州的士唔单止换咗颜色，而且仲唔止一只色，大家都冇咩唔习惯。大家好快就适应咗唔同嘅颜色，而且仲形成睇色打车嘅习惯——夜晚打上边提到嘅几间大公司嘅车，安全系数会高好多，车身颜色变成“生招牌”。