二沙买波衫

原标题：二沙买波衫

广州仔女去开嘅二沙体育用品一条街，从年头开始就传出要拆，搬去大沙头海港运动城。呢个地方唔远，行两步就到，所以，估计20年积累嘅人气亦唔会因为搬迁而受到好大影响。

广州卖体育用品嘅地方好有意思，一系就位于大商场，好似以前南方大厦，而家天河城、正佳呢一类，作为零售百货一个重要组成，专门辟出区域来卖。一系就依附于大型体育基地，比如东较场、二沙体育训练基地等。因为呢啲地方一定有运动员帮衬，而且，体育基地会开放部分场馆供俾街坊游水打波做健身，所以散客从来唔缺。

二沙体育用品一条街嘅兴盛就系依托于二沙基地，连同附近东川路一带亦都受惠，见证住呢座城市嘅发展。

就讲“买波衫”呢件事。上世纪九十年代，二沙一带嘅波衫好多都批发，散客入到去，店员面口一般。1994年，中国足球走向职业化。市民踢球热情高涨，开始追明星队明星衫，二沙波衫销售进入全盛期，琳琅满目乜队都有，而且包印名、印号码，买得多仲有嘢送。

不过呢几年，二沙同其他实体店一样受到互联网冲击。由于铺面有限，佢哋唔容易向现代体验式销售转型，生意亦受到影响。呢个问题，希望喺搬迁之后会得到改善，令广州人购买体育用品会有一个更好嘅环境啦。