花城赏花攻略

原标题：花城赏花攻略

白话广州 ◎陈嫚 职员

春天来了，最近喺朋友圈晒樱花、桃花、油菜花嘅人好多，金灿灿、粉嘟嘟，睇到个个都心痕痕。广州号称花城，四季鲜花盛开，但系最多花赏嘅季节正系依家，因为好多花都系春天先开，3月份真是赏花最佳时期。

数下3月份有乜嘢花睇先：樱花、桃花、梨花、油菜花、木棉花、茶花、玉堂春、黄花风铃木、紫荆花、杜鹃、玫瑰、禾雀花，其中梨花、桃花、樱花、茶花、油菜花、玉堂春嘅花期都系到3月份，呢个月唔睇，到下个月就可能冇嘅了。如果大家要赏花，都系将嗰啲差唔多收市嘅花睇咗先。

茶花可以去帽峰山天湖茶花园、动物园茶花园睇；要睇油菜花可以去石门黄金花海、花都红山村油菜花、海珠湿地；睇樱花可以去从化天适樱花悠乐园、创业公园、黄山鲁樱花园；睇梨花可以去十八罗汉森林公园；而玉堂春呢，烈士陵园、大夫山公园就有得睇。

木棉花、紫荆花、杜鹃花、玫瑰花、禾雀花从呢个月开始盛开，花期一般都有两三个月，慢慢睇都唔迟。木棉、紫荆、杜鹃比较常见，而玫瑰花、禾雀花系就要专门去一啲地方睇比较好。禾雀花喺石门森林公园、天麓湖公园、华南植物园有得睇，而睇玫瑰呢，可以去宝趣玫瑰世界、云台花园玫瑰园、流花湖玫瑰园。到咗五六月份，可以去赏凤凰木、荷花。