旧时越秀山

原标题：旧时越秀山

最近，越秀山脚被发现一块法文墓碑，怀疑系英法联军入侵时留低嘅。原址应该喺当年黄埔深井法国人集体墓地，辗转迁到呢个地方。

有外地朋友可能唔明白，越秀山都算系个市民休闲嘅地方，点解要放一块碑呢？其实，旧时广州市中心无咁大，四方界线分别系大东门、珠江（南）、西门口同小北门。界外皆属郊区，有好多葬地，例如燕子岗、白云山、淘金、西塱、梅花林……越秀山算系一处热门，新中国成立之前，呢度山坟满布，荒草凄凄，密度之大，以致棺材压棺材嘅事件亦非罕见。直到大迁坟之后，山头先有今日满眼翠绿嘅美景。

越秀山之所以成为旧时“阴宅名盘”，系因为广州人两千几年来都认为佢风水好。就连南越王赵佗嘅陵墓，据文物专家考证，都好有可能隐藏喺呢座山下。越秀山山势延绵，伸向珠江，大有“飞龙吸水”之意。喺度安葬先人，亦足堪告慰死者了。

此外，越秀山离当时“方便医院”（即市第一人民医院）亦唔算远。喺医院到西华路一带，以前沿路布满棺材铺，铺中可以请到“九叔”——从事丧葬行业嘅人，就如《僵尸道长》中林正英嘅角色。佢地为街坊办理葬仪之后会送去越秀山，尘归尘，土归土。

鉴于越秀山有咁样嘅背景，块碑出现喺度，亦算合情合理。佢本身，亦系广州历史嘅一段写照。