旧广州叫卖声

原标题：旧广州叫卖声

镇海楼正在举办《广府旧事-19世纪广州外销通草画中的城市生活》展览，50几幅作品，记录咗唔少老广州嘅旧行当，令我又谂起如今已经越来越少嘅广州街头叫卖声。

“铲刀，磨铰剪；磨铰剪，铲刀”、“补镬补镬，整烂风炉补沙煲”、“和味龙虱桂花蝉”、“骟鸡又骟猫”……昔日涉及生活方方面面嘅旧行当，就随住呢啲叫卖声，送到每一户街坊屋企。

听讲，最长嘅叫卖声系“卖烂嘢，收卖烂嘢，有乜嘢旧铜煲烂锑撑就好攞出来卖咯”，长达23个字，经收买佬一气呵成，独特嘅粤韵，喺石板街同西关大屋之间飘荡，穿越咗好几个时代。

至于街头叫卖如何形成、几时出现，至今已不可考。不过佢绝对同城市结构有关。因为老广州街巷狭窄幽深，街坊办事出来一趟唔容易，小贩就干脆“送货上门”，既方便顾客，自己亦可以争取主动。

既然系小贩，有时就会出现竞争同拗撬。记得八九十年代，粤语相声名家杨达同黄俊英就创作咗相声《豆腐苞粟》，讲一个卖豆腐同一个卖粟米嘅小贩，啱好企埋一齐做生意，前者叫“豆腐”，后者叫“苞粟”，听起来就好似“豆腐包馊”咁，搞到豆腐小贩冇办法做生意，闹出好多笑话。

而家，呢啲趣事亦随住街头叫卖声嘅消失，逐渐埋藏入记忆中了。