绣春刀与水果刀

原标题：绣春刀与水果刀

□ 微生亮专栏

听闻《绣春刀》剧组想将呢套戏拍成三部曲，如果唔改变下宣传策略，睇怕第二部依然卖唔到钱。计我话，第一部如果叫《那夜凌晨，我没有杀魏忠贤》，系唔系会有好多人感兴趣啊？

故事就系噉，大老虎魏忠贤倒台之后，其契仔赵靖忠上位，假传圣旨派出三大锦衣卫追杀魏忠贤，而锦衣卫沈炼为咗帮心爱嘅女人赎身，收咗魏忠贤嘅买命钱，回京之后立即卷入中央权斗嘅漩涡，三番两次几乎丧命，卒之体会到“阉党树大根深”其实并唔系明朝末年最大嘅危机。满朝上下交相勾结，岂能分得出边个系阉党边个系清流？魏忠贤秘密返京之后，赵靖忠一干人等虽然心怀鬼胎，但仍然要到魏忠贤尊前俯首听令，自我批评一番。呢场整肃朝政嘅风暴由崇祯皇帝一手控制，佢可以随时停落嚟。所以当赵靖忠全力打击阉党，崇祯即时呵斥：“你想让我无人可用是吗？”我唔系制度性反贪，澄清天下以后先讲，先杀魏忠贤重新集权。喺呢种政局入边，锦衣卫虽然衣着光鲜，有社会地位，令官场胆寒，但呢一身飞鱼服，上头可以随时打赏又随时攞走，因为佢哋只不过系一条狗。

剧情够生猛，服饰道具都做得非常之好。电影里面不断出现嘅绣春刀、飞鱼服特写镜头，除咗要营造视觉效果，别有一番意味。锦衣卫总旗卢剑星系三个人当中最正直嘅，当差恐怕都有十几廿年，武艺高强，勤勤恳恳，但忠忠直直，看上去“一准不是阉党”(赵靖忠语)，所以始终当唔上百户。而百户系正选六品武官，成为百户，算系正式踏入官场。当佢终于得到梦寐以求嘅职位，卢剑星着起百户官服，小心翼翼，充满敬畏，着好官服嗰一霎那，佢似乎立即成为咗“官”。但系，借用锦衣卫靳一川嘅师兄丁修嘅话，靳一川本身系江湖中人，杀掉锦衣卫冒名顶替，佢师兄丁修就讽刺佢：“你真的以为你穿上了飞鱼服你就是官呀？贼就是贼。”识得唔识得啊？

丁修呢啲江湖人士，随身携带一把长刀招摇过市，警方锦衣卫竟然坐视不理。不过，踢足球打黑波嘅人都可以解释“我身为一个汽车维修员，有个锤喺身边，亦都好合逻辑”(《少林足球》台词)。后世啲江湖人士有样学样带刀出街，理由竟然系：“因为我好钟意食水果口架，去全世界都带住榴莲。”