“早唞”咪乱讲

原标题：“早唞”咪乱讲

广州塔公益灯光设计大赛落下帷幕。有本土文化人认为，大赛以“广州，晚安”为主题，缺乏本土方言味道，不如改成“广州，早唞”啦。此言一出，马上有另一位文化人指出，“早唞”两个字，认真唔掂喔。

点解？因为“早唞”系个多义词，可以祝人早啲瞓，亦都可以咒人早啲死。喺广州话里面，暗示死亡嘅词语有好多，比如话一个人行先一步，走咗，香咗（亦即系“臭咗”），直咗（形容死时僵硬），卖咸鸭蛋（同样指“臭”），吊起个砂煲（旧时码头工人用砂煲食饭，吊起咗，就表示唔使食了），拉柴（用来烧尸）……都系！

记得一年春节，有个外地朋友问我：“你哋广州人中意发财，我要祝福佢哋全家，可唔可以祝佢哋全家富贵啊？”我话：“你千祈唔好啊！全家富贵即是冚家富贵，咒人哋一家死清光，新年流流，咪搞啲咁嘢啊！”外地朋友就话：“你哋广州话真多禁忌。”

不过，就算你唔小心讲错咗都无相干嘅，广州有条不成文规定：只要讲声“大吉利是，百无禁忌”，就似乎乜嘢诅咒都解晒了，就好似开玩笑咁。

其实认真追究落去，如果广州人内心禁忌真系好多，又点会俾你轻轻一句就过骨啊？咁容易放过，恰好证明：对于禁忌，广州人从来都未惊过。