三个棠下

原标题：三个棠下

呢排，新闻话广州有啲公交站重名，搞到唔识路嘅街坊晕坨坨，其中棠下就有两个，一个喺天河区，一个喺白云区。

其实，广州共有三个棠下，仲有个喺萝岗区九佛镇，只不过冇前边個两个咁出名。除咗广州，江门新会亦有个棠下。

点解有咁多“棠下”？莫非背后有啲乜嘢故事？翻查资料，原来唔同嘅“棠下”，村名来历差天共地。天河嘅棠下，相传系南宋嗰阵，中原啲人为咗避战祸，经南雄珠矶巷来到呢度，因为村建喺一棵甘棠树下，故名棠下。甘棠，亦就系棠梨树，又叫野梨、铁梨。但其它两个“棠下”，跟甘棠树就冇乜关联。白云嘅棠下，据说原来叫“唐夏”，后来因某个朝代皇帝嘅名，避讳改为棠下；亦有人话，呢条村刚好喺棠溪村嘅南边（下首），所以先变成“棠下”。至于萝岗区嘅棠下，就系建村喺一眼鱼塘下方（南边），原本叫塘下，后来取谐音叫棠下。

今时今日，广州三个棠下亦有唔同嘅特色。天河嘅棠下，以往系城中村，家阵变成咗广州嘅居住中心之一，云集咗唔少大楼盘。白云嘅棠下亦唔输蚀，村中嘅远景路韩国风情街，有唔少韩国人经营韩国料理、美发店、韩国超市等等。至于萝岗嘅棠下，虽然离市区远，但村里边有个“广州水果世界”，搞生态农业同旅游观光，亦好出名。