单眼佬睇女婿

原标题：单眼佬睇女婿

“打个格仔啦，唔好俾人‘单眼佬睇女婿’先得嘎！”，呢日喺小区度，听到一位阿婆教佢个女，唔好将个孙女张相毫无遮掩咁晒上网。单眼佬睇女婿——一眼睇晒，系广州话嘅一句盏鬼嘅歇后语：女婿第一次上门，系人都会望多几眼，睇个明明白白，就算单眼佬得一只眼，佢亦要睇得清清楚楚。

一眼睇晒，有两种意味，一种系话啲嘢简单直接，不费心神就一览无余，呢个系好事。譬如，加阵好多政府部门嘅服务好周到，整个微信公众号，所有服务网点列成一个表格。街坊办事，一眼就可以将网点睇晒，拣自己就近嘅网点办理业务，有时甚至一键就可以到达网站链接，一站式服务，十分贴心。网络，为办事创造咗最大嘅便利。

第二种，表示隐私暴露于他人面前，呢个就唔系咁好啦。加阵，唔少街坊中意喺网上“晒”，晒工作，晒细路，晒美食……唔少人嘅朋友圈，朋友构成越来越复杂，但隐私意识不足，有时候一唔觉意，就将自己个人嘅隐私曝光，分分钟为啲坏人创造可乘之机。事实上，互联网越便利，隐私暴露嘅可能性就越大。就好似开头讲嘅例子咁，阿婆教得有道理，晒细路要多个心眼保护自己，譬如打个格仔、用侧面影相、设置下朋友圈嘅权限等等，咁先唔会俾人“一眼睇晒”。