灯油火蜡

原标题：灯油火蜡

“唔卖咁贵边有数为啊？灯油火蜡都唔够俾啦”，快餐店嘅老板同啲客人倾偈。呢两年，好多街坊都发现，虽然工资冇乜嘢上涨，但啲嘢就贵咗唔少，前两年十蚊就可以食个好嘅快餐，加阵已经好难搵到。

广州话讲嘅“灯油火蜡”，象征铺头或企业维持经营嘅成本。大致可以推断，旧阵时做生意，花喺照明嘅灯、油、火、蜡等物资上，估计占嘅成本比例唔细，所以先会有咁嘅讲法。不过，如今时代唔同晒，大多数行业，电费、燃油费占比已经少咗好多，社会高速发展使得能源物料嘅供应相对变得顺畅。相比之下，对于小企业或者个体户，如今成本最大嘅两部分，变成咗人工同租金。究其原因，一方面，人力资源越来越稀缺，工资成本不断上涨；另一方面，以前啲小企业或个体户，物业一般系自有，加阵租赁市场发展咗，且租金亦空前上涨。

广州啲铺头，租金上涨势头一直好猛，尤其系旺地嘅铺租，节节攀升。统计数据话，珠江新城及天河北板块,呢几年商铺嘅租金几乎每年升幅10%以上。而人工方面，尤其系餐饮、快递、建筑等辛苦工，更加紧缺。今年年头嘅一项调查话，春节后近19万外来工不再返岗，用工荒推动咗人工上涨。咁样睇落，餐厅等灯油火蜡确实多咗唔少，无怪乎佢哋要逐年涨价。