“丫呜”

原标题：“丫呜”

“丫呜”系咩嚟嘎？宜家啲80后、90后可能真系唔知。“丫呜”系以前广州街坊一个用嚟吓细蚊仔嘅“怪物”嘅名。

宜家啲细蚊仔真系幸福，就算唔听话，老窦老母都会好耐心咁教你，但以前（70后之前吧），家家嘅细路，少则三四个，多则五六个，生活又困难，作为父母剩系顾住揾两餐，边有咁好心机同耐性教呀。所以，啲仔女唔听话，对大嘅就“藤条炆猪肉”，对细嘅就靠吓——“仲唔收声，丫呜嚟啦”、“仲唔瞓，丫呜婆嚟啦”。细蚊仔就弱弱咁问：“丫呜”系咩嚟嘎？大人就答：怪物，专食细蚊仔。

被“吓”大之后，小弟发现，其实“丫呜”唔系怪物，佢嘅来历系咁嘅——

汉朝有个大将军叫做刘胡，因为皮肤坳黑，大家就叫佢做“坳胡”。呢个“坳胡”将军武功高强，好打得，敌人都好惊佢。慢慢，坏人提到“坳胡”都会脚仔软，纷纷买佢怕。呢个咁英勇擅战嘅人物流传到民间，就俾广州人读作“丫呜”并利用嚟教细蚊仔，哦，唔系，应该讲系利用嚟吓细蚊仔。

所以，“丫呜”只系个生得黑啲，唔靓仔嘅将军，只系坏人先要惊佢。

今年六一前，广州警方去幼儿园推出微电影《别拿警察吓孩子》，用意其实一样：阿sir系用嚟吓坏人嘅，唔系用嚟吓细蚊仔嘅。