卜卜斋

原标题：卜卜斋

新闻讲：记者近日走访发现，旧时私塾建筑至今仍遍布广州，但大多处于闲置状态。

阿六讲：私塾最先系指古代细路仔学堂，而老一辈广州人仲有一种传统叫法——卜卜斋。听落都几得意，点解咁叫嘅？

首先解释一下呢个“卜”字。呢个字喺粤语当中有三种意思：一种系动词，敲打嘅意思，并且主要指敲打头部位置；第二种系象声词，包括敲打时发出嘅声音；第三种系形容词，土里土气嘅意思，如：称乡下嚟嘅人叫做“卜佬”。

宜家有啲教育机构个名都叫做私塾，不过，学生就唔一定系细路仔。但以前啲私塾，学生就全部都系细路仔，而且当时受封建思想影响，去私塾读书嘅都系男仔居多。男仔当然就比较调皮，作为老师，有啲适当体罚系难免嘅。所以，当有学生唔听话，或者背书背错，屡教不改时，老师就会用一把间尺或者竹片，敲打学生个头，“百讨厌嗱”、“唔温书嗱”。亦有啲老师系打学生嘅手或者箩友。不过，唔理打边度，打出嘅声音都系“卜卜”声。

而以前嘅书房、学舍系有“×斋”嘅叫法，并且多数设喺横街窄巷里面。当街坊行过私塾，经常听到里面老师学生“合奏”嘅“卜卜”声传出嚟，久之，大家就将私塾叫做“卜卜斋”。

宜家嘅学校再唔会有“卜卜”声嘞，不过“卜卜斋”呢个既幽默又贴切嘅粤式叫法，至今仲系令人津津乐道。