泮塘五秀维权

原标题：泮塘五秀维权

新闻讲：前日，广州市泮塘食品公司董事长李少桦拿着正牌泮塘马蹄粉和仿冒产品，来到知识产权日咨询活动现场维权。

阿六讲：马蹄粉都有人仿冒？唔好睇少呢个马蹄粉，佢大有嚟头，俾人仿冒一啲都唔出奇。

要讲呢种马蹄粉，就要先讲讲泮塘。

泮塘，系指宜家荔湾湖公园、泮塘路、南岸路、中山八路一带。唐朝开始，呢度就盛产莲藕、马蹄、菱角、茭笋、茨菇。由于当地嘅土地特别肥沃，而且阳光充足，种出呢五种水生植物就宁舍靓，而将佢哋作为食材做出嘅食物味道就特别香甜爽口，所以被美名为“泮塘五秀”，流传至今，成为西关一个驰名嘅传统食品品牌。

不过，要做出坚嘢嘅“泮塘五秀”食物要求系好高嘅：从种植到原料加工全部都要按照古法，整个制作过程全部用人工，材料纯天然，唔放添加剂、色素。

咁边个可以做到呢？就系泮塘食品公司嘞。呢间属于中华老字号(注册商标“泮塘”)嘅公司，有两百几年历史，系清朝嘉庆年泮塘李氏族人李坤耀喺逢源路创办，店名叫“泮塘五秀”，之后代代相传。而前日去维权嗰位李少桦女士，就系呢间老店嘅最新一代传承人。

中华老字号一直有“北有同仁堂，南有老泮塘”嘅讲法。所以，“泮塘”维权唔系一间企业嘅小事，而系保护广州“名牌”嘅一件大事。