自来雀

原标题：自来雀

前两日番禺发生咗件奇事，几只好似孔雀咁嘅大雀定时定候飞入某小区散步。住喺呢个小区嘅人就开心喇，因为“自来雀”意头好啊。

我谂唔少街坊都遇到过“自来”嘅动物，好似猫仔狗仔雀仔咁样，其实都好普遍。不过，对于猫同狗，老一辈嘅人就有“猫穷狗富”嘅讲法，所以“自来猫”意头唔好。而遇到“自来狗”，咁你就要好饮好食咁招呼佢，有条件嘅，仲可以考虑留住佢添。

当然，呢个讲法系有啲迷信嘅成分。但系对于“自来”动物，广州人一般都系欢迎嘅。广州有个五凤村，相信大家都知，佢之所以叫“五凤”，就同五只“自来凤凰”有关。据讲以前当地有大片松竹，好多雀仔喺度安家，十足一个小鸟天堂。谁知后来有恶鸟相斗，将呢个地方搞到乌烟瘴气，菜田果林被毁，雀仔全部飞走晒。后来有个后生仔发咗个梦，有高人指点佢去漱珠岗修缮高台引凤，点知呢个做法真系有效喔，五只凤凰从天而降，其他雀仔又重新归位，所以呢个地方就叫做“五凤村”喇。

认真考究嘅话，“五凤”算系“半自来”神鸟。而呢个关于地名嘅来源，事实上不过系一个民间传说。话实，广州有唔少同动物有关嘅地名，好似瘦狗岭、犀牛路、蟾蜍岗等等，估计当中都有一段传说。唔知边位高人可以来解释一下咁呢？