各处乡村各处例

原标题：各处乡村各处例

新闻讲：4日是清明正清日，傍晚，大量祭祖返城车辆导致广州多条进城路段大塞车。

阿六讲：宜家生活喺广州嘅老广州人，虽然够“老”，但佢哋大多数祖籍都唔系喺广州，而系喺市外省内嘅乡下，所以，每年清明都要返乡下祭祖。

广州人对祭祖有几种叫法，有叫拜山，有叫行清，当然，亦有叫扫墓嘅。而对于几时返乡下去祭祖，就系各处乡村各处例。

有侨乡之称嘅台山，按照传统习俗系唔会行正清嘅。当地每年只要过咗农历正月，就可以祭祖，并且多数系集中喺农历二月上半月，一过咗呢个时间，祭祖就算“水尾”。所以，每年一过完年，好多祖籍台山嘅广州人就会迮迮临返乡下搞掂呢件事。

同台山人有啲相同嘅系客家人，佢哋亦唔会行正清。按照传统习俗佢哋祭祖会选择系农历二月或者九月。九月祭祖！真系有心唔怕迟，九月都系祭祖时。

肇庆人祭祖时间就比较有弹性，除咗“新山”要行正清之外，拜“旧山”时间，可以系正清，亦可以唔系，但一般只推迟唔提早。我曾听讲过，有好多祖籍肇庆嘅人多年来都系喺“五一”先至返乡下祭祖。

睇到每年清明节因为高速路免费，而搞到出城入城都大塞车，小弟觉得，祭祖日各处乡村各处例，其实系祖先要我哋“错峰”拜山，几好呀！