姓名与同音字

原标题：姓名与同音字

“班主任上课前用粤语点名：简磊世、钟洛佳、卫秋根……”呢段系最近喺微信群转得几厉害嘅粤语同音字笑话。

广州人有句俗语：唔怕生坏命，最怕起错名。所以起名嗰时系会反复斟酌嘅，尤其系粤语读音，一定要系冇同音字引起歧意。所以，现实中其实系好少出现“简磊世”以及粤语影视上成日有嘅“吴广德”、“武题”呢啲名嘅。

不过，名就话可以想点起都得，但个姓你系冇得变嘅，有时同一啲职务撞埋一齐就难免成为同音字笑话。比如，小弟一位同事，姓徐，官至副主任，但大家都唔好意思叫佢做“徐副主任”，事关粤语“徐副”同音“除裤”（脱裤子）。仲有姓邱嘅，如果后面系个“副”字就搞笑咯——邱副同音“丘裤”（提裤子）。而姓吴嘅，如果做理事就笑甩大牙嘞，吴理事——唔理事（不管事）。

上述系讲姓氏喺工作上“制造”嘅笑话，而生活上同样难免。比如结婚摆酒，都会喺酒楼大肆公布“××联婚，席设×楼”，但如果新人咁啱系以下姓氏，咁就系笑通街——汤朱联婚（ 猪）、刘文联婚（流氓）、柯廖联婚（屙尿）、赖史联婚（濑屎）、刁李联婚（呢个唔方便解释）……

话又讲番转头，同音只系巧合，所以，即管官照当，婚照结，话之人家点笑啦。

当刂