波罗鸡

原标题：波罗鸡

寻日落住倾盆大雨，但系好多人都仲系去黄埔波罗诞捧场，唔知大家有冇帮衬买返只波罗鸡呢？

波罗鸡唔系“菠萝鸡”，前者可以用来祈福，后者则系用来“医肚”。点解去波罗诞要买波罗鸡呢？其实关于波罗鸡嘅来源，有好几个版本，至于边个系真嘅就已经无法考究。民间有咁样一种讲法，认为波罗鸡是“神鸡”，如果边个运气好可以买到嗰只识啼嘅波罗鸡，就可以发达致富。更加直观啲嘅讲法，就系话“鸡”同“吉”同音，所以波罗鸡有吉祥如意嘅含义。正因为咁样，每年举办波罗诞嘅时候据讲应该做三件事：第一游波罗，第二娶老婆，游完波罗娶完老婆，顺手要拎一公一乸两只波罗鸡返屋企，咁先可以“吉祥如意”。

虽然波罗鸡系吉祥物，但若然用来形容一个人，就绝对唔系话呢个人“吉祥如意有福有寿”。喺广州话里边，“波罗鸡”有句歇后语，佢嘅下一句系“一味靠黐”。呢句话真系几形象，事关整一只波罗鸡，除咗鸡模型同鸡毛之外，浆糊系必不可少嘅——要将鸡毛黐上模型，咁就梗系要用浆糊一味咁黐啦。所以话一个人系“波罗鸡”，咁就系话呢个人极之孤寒，黐饮黐食，成日揾人着数占便宜喇。

所以，波罗鸡要买，菠萝鸡可以食，但系做人就唔好做“波罗鸡”喇，冇朋友嘎。