好物沉归底

原标题：好物沉归底

广州话嘅好多俗语，不但务实而且充满生活嘅智慧，有一句话就体现得好到位：好物沉归底。凡事唔使猴急，等到最后先至可以攞到最好嘅收获，亦即系话，做人亦系“淡定有钱剩”。

嗰日同班朋友去茶楼饮茶，因为大家都赶住返工，三下五落二就将台上嘅点心，食到七七八八。临到后尾，差唔多饱阵时，发现最尾上来嘅嘢，先至系自己最中意嘅。好简单，垂手可得嘅点心，都系提前整好，味道当然唔及现煮现卖。“好物沉归底”，呢个时候大家都发出同样嘅感慨。就好似好多文学名著，作家花费大量功夫，潜心创作。不过呢种努力有时得唔得市场嘅体现，排喺书店畅销榜前面嘅，却系快餐式嘅网络文学、心灵鸡汤之类。如果我哋作为读者，只睇畅销榜买书，可以想像，会错过几多“沉归底”嘅好作品。

家阵呢个年代，最考验人嘅，就系耐性同专注力。营销嘅思维一早教人，最好嘅嘢要放喺最前面，要俾人第一时间睇见。呢个做法本来冇错，只不过有时会无形中使人造成错觉，以为亮点全部睇表面。就好似睇一部戏咁，睇完开头，早已经等唔切去到收尾，匆匆判断，匆匆放弃，令人错过咗好嘅嘢。“好物沉归底”，呢句俗语，刚好喺另一角度话俾我哋知，只要耐心等待，说不定收尾会有惊喜呢。