到喉唔到肺

原标题：到喉唔到肺

◎闻歌 媒体人

屋企有细路嘅街坊都知道，细路中意某样嘴头，譬如糖，如果你俾一大袋佢，说不定佢好快就食厌；如果只俾佢半粒，佢肯定食完仲谂，赖地都要。白话有句俗语，“到喉唔到肺”，就形容细路遇到嘅呢种状态，越系难到嘴嘅嘢，显得越矜贵。

前几日，广州首家苹果店喺天河开张，排队嘅粉丝简直疯狂，有人排咗两晚，冻雨丝湿都唔怕。点解？呢个同苹果一直以来嘅策略有好大关系。出一款产品，佢唔会俾足供应量你，由你排队、预约，连上市嘅地区都会排个顺序，然后佢哋就好享受咁，睇住你哋争啦，抢啦，代购啦，水货啦。所谓饥渴营销，就系追求呢个“到喉唔到肺”嘅效果，吊下你嘅瘾。冇办法，边个叫人哋技术卓著，你唔买都唔得。所以话，吊瘾亦要依靠实力。

其实，苹果喺国内已经开通咗唔少直营店，包括深圳，点解广州咁迟先开，唔通佢睇唔起广州市场？非也，呢次广州开分店，连苹果“一哥”库克都发咗微博祝贺，称广州为“久负盛名的花城”，可见佢对广州嘅重视。相反，以前广州人买苹果易过借火，求其就可以搵人喺香港带部返来。依家，苹果本身销售下滑，业绩压力大，将广州在内嘅市场做一次深挖，希望挽救人气就真。到底广州会唔会为苹果带来好运，咁就睇过先知。