姨妈姑爹

原标题：姨妈姑爹

前几年嘅香港剧集《溏心风暴》中，Sa姨最中意讲嘅一句绕口令，将广州话嘅亲戚称谓，几乎全部唱晒，观众笑到碌地：“堂就大过姑,姑就大过姨，姨就大过表叔公……”

Sa姨唱嘅，亦系旧阵时对亲戚嘅座次排行，男方嘅亲人比女方嘅亲人地位要高。不过今时今日，随住男女平等，呢种亲疏差别已经唔存在，不过广州人对于姨妈姑爹嘅嗌法，确实花样繁多。怪唔得，平时都经常见到好多后生仔，探亲阵时都挠晒头：老豆嘅妹叫姑姐，甘老窦阿姐系咪叫大姑？表婶同表嫂有咩唔同？有啲仲需要老人家慢慢指导，搞到好繁琐。

呢排，元旦过咗，来紧就系农历新年。有人喺网络整咗张广州话亲戚称谓图，方便逗利是咁话，真系贴心到家。对比下，广州话跟普通话，对亲戚嘅每种嗌法，都有细微嘅差别嘅。攞大佬来讲，可以叫哥哥、哥、阿哥、大佬，“大佬”本身显得轻松，阿哥就比较正统。专家话，“阿”系广州话嗌亲戚嘅“万能词头”，阿哥、阿姐、阿嫲等等。不过，家阵好多街坊中意用叠字，譬如嫲嫲、姨姨、女女，咁样更亲切啲。而且，广州人受到开放文化嘅影响，家阵嗌亲戚，都洋气咗好多，爹啲妈咪自然唔使讲，有时叫舅父或者阿叔，都叫uncle，咁就简单得多，唔再出现“姑就大过姨”嘅问题。