最潮创意园

原标题：最潮创意园

年纪大咗，就中意同以前嘅老同学叙下旧，讲起聚会地点，即刻有同学提议去红专厂。查实最近我啱啱去过嗰度，而且都系同学聚会，所以我表示反对。点知个同学眼珠一碌，提议地点改成羊城创意园，搞到我冇得反驳。

细问之下，原来呢位同学超级中意去啲创意园，仲同我哋呢班同学极力推荐。虽然我喺广州住咗16年，知道广州少数嘅两三个创意园，但好彩得呢位同学介绍，我先至开咗眼界——原来广州又潮又好玩嘅创意园咁多嘎！

据说，广州目前一共有24个创意产业园，其中有漫画制作嘅，有网络音乐创作嘅，有手机游戏设计嘅，有时尚设计嘅，也有软件开发与服务嘅，其中最有名嘅，起码有五六个。首先就系呢位同学提到嘅红专厂和羊城创意产业园喇！红专厂喺员村，里面有红酒厂、红砖屋、大石馆，有浓浓嘅文艺气息。而羊城创意产业园黐住骏景花园，园内绿树成荫，随处都有创意涂鸦和雕塑，其中嘅漫塑广场非常值得推荐。呢两个创意园应该系最受后生仔欢迎嘅了。

新港中路嘅TIT创意园都唔错，佢以前系广州纺织机械厂，所以有浓郁嘅服装文化和时尚创意特色。另外，革新路嘅太古仓、芳村大道嘅1850创意园、新港东路嘅琶醍，都系好出名嘅。以后大家聚会，就唔使烦冇地方去了。