猫面、狗面，老细嘅口面

原标题：猫面、狗面，老细嘅口面

□ 司徒笨笨

打工仔有三怕：一怕炒鱿、二怕瘦身、三怕食猫面。头两怕容易理解：炒鱿即系遭人解雇，呢个已经用咗好多年；瘦身系“瘦薪”嘅谐音，即系减人工(也可以解作公司裁员、精简架构)，系2008年金融危机之后开始流行嘅讲法。最后一怕食猫面，讲历史应该唔短，不过近呢几年就少人用啦！

“食猫面”系挨闹、被人喷、令人难堪噉解。按《广州话俗语词典》解释，“食猫面”原本应该写成“识貌面”。因为人发嬲嗰阵，嗰样会发生变化，正所谓怒容满面。畀人闹嘅一方睇到就会觉得难堪、害怕，呢个就叫做“畀嗰貌面佢识”。后来呢句话以讹传讹就变成咗“畀嗰猫面佢识”，再后来又简化成“食猫面”。(喺国内粤语媒体甚少听到用呢个词；而喺香港电视剧里面，打工子女被老细“吠”，有时会用“食猫面”，但更多时候会使用“照肺”。未知系唔系呢个原因导致“食猫面”嘅认知度下降呢？)

“猫面”系唔系会令人觉得害怕，见仁见智。不过而家互联网上大凡讲到猫，都会用“瞄先生”嚟替代，而呢啲“瞄先生”又几乎都被视作“萌物”，所以你话“猫面”会令人感到难堪，喺今时今日真系好难讲得过去咯。

有“猫面”，好自然就有“狗面”。“狗面”会畀到大家咩印象呢？我嘅第一反应就系“煠熟狗头”，即系嬉皮笑脸、认亲认戚噉嘅样。好明显，“猫面”同“狗面”系对立嘅，所以粤俗当中就有一句“一时猫面，一时狗面”，用嚟形容人嘅面色、脾气变化无常。

边啲人最兴“一时猫面，一时狗面”呢？打工仔女一定会话系嗰啲无良老细。佢哋从来唔懂得尊重员工，有功佢领，有锅就员工掮；求你做嘢嗰阵就狗面一张，心情唔好嗰阵就请你食碗猫面，正一“有事钟无艳，无事夏迎春”。所以想领略下咩叫做“一时猫面，一时狗面”，睇下老细嘅口面就知道咯！不过撞着噉嘅老细，都系早走早着为上啊！