“捞松”考究

原标题：“捞松”考究

论尽母语

好多人认为广州话中称北方人为“捞松”系一个不敬甚至系侮辱嘅叫法，我经常谂，到底系唔系真嘅不敬甚至乎侮辱？虽然喺生活当中，大众对语言有约定俗成一说，但系此话似乎并未“约定”更未“俗成”。根据我嘅推理及调研，我觉得“捞松”非但不含不敬，更唔系侮辱，反而系一句带点尊敬嘅称谓。

呢几十年因工作关系，我一直喺北方人比较多嘅单位工作，亦有一啲倾得埋嘅北人朋友。有一次，我忍唔住问一位可以无所不谈嘅北方老同事：“喂，你点睇‘捞松‘呢个叫法？你会唔会觉得系不敬甚至系侮辱？”佢话：“点会呢？冇乜啊，都系一句啫，其实呢句话喺50年代初期就有啦。”

“50年代初期就有”似乎符合我嘅推论。我话：“按我嘅推论，呢个讲法应系源自1949年之后广州人面对南下干部时讲唔正国语，将‘老兄’一词讲成‘捞松’，啱唔啱？”佢话：“可能系。嗰时我老窦佢哋南下嚟到广州，同广州人打交道，广州人嗰时识得讲国语嘅唔多，我哋识得粤语嘅就更少，喺沟通上确实存在啲问题。听唔懂广州话，有时就会产生误会”。

我作为识讲国语嘅广州人，觉得其实“捞松”从词嘅发音嚟讲，应为“老兄”，“捞松”应系误读或误译，广州人发音lao字尤其系第三声时，往往讲唔准，将“老”字讲成为“捞”字。“兄”字亦难于把握，直接就将国语移植过嚟，发成“捞松”音，特别系有啲广州人讲嘢嘅口气比较倔，短句多，更容易产生误会。久而久之，成为贬损词就唔奇怪喇。

老兄系亲切嘅称呼，自己认做小弟，表明广州人嘅谦卑。但一句出发点咁好嘅称谓，竟演变为意思相反嘅不敬甚至侮辱性嘅贬损词，真系谂唔到。如果多啲沟通，呢种误会应唔会发生。