南方电视台主持人彭彭:我真心中意呢個 自信、內斂嘅城市

原标题：南方电视台主持人彭彭:我真心中意呢個 自信、內斂嘅城市

日期:[2014-09-22] 版次:[AT10] 版名:[广州骄傲] 字体:【大中小】

彭彭 彭彭,老广州人,出生于广州西关。广东广播电视台《今日最新闻》主持人。说话幽默耿直,常以尖锐、诙谐的语言评论时事,因其节目新闻内容贴近民生,评论内容反映民意、独立理性,受到广东观众的欢迎。被称为广东三大名嘴之一。众多经典口头禅,统称为“彭彭第N定律”。

對於我來講,廣州係一個熟悉得不能夠再熟悉嘅地方。雖然祖屋喺河南(海珠區),不過從細喺西關出生、長大;再到東山讀書,又再到越秀居住;最後喺天河落腳。用一句廣州俗語來講就係「甩到成廣州腳毛」。每一個地方都幾乎有我成長嘅印記,每一個區分都有我成長嘅故事。對廣州熟悉嘅程度哪怕每次坐飛機,我都會選擇窗邊的位置,喺降落之前嘅繞行階段,睇睇廣州嘅改變。

而廣州最令我喜愛嘅地方,唔係林立嘅高樓大廈,唔係世界排名幾高嘅地標建築,更絕非什麼GDP、CBD,以及「文明衛生之城」嘅虛名。而係最令我舒服、中意嘅傳統廣州人價值觀同處事態度。無論外人讚美呢種態度係「務實」,抑或鄙視為「現實」,老一代廣州人都唔多介意。自己做自己事,自己搵自己錢,根本無需炫耀,亦更加唔想俾人知。同時,往往因為廣州人嘅不爭論、不解釋,就有更多嘅外人延續各種對廣州人固有嘅觀念。其實廣州人首先係一個“生”字。唔係違反計畫生育超生,而係生猛、生動、生產。唔少人覺得廣州人“怕死”。但係留意下廣州呢個改革開放窗口就可以發現,第一代個體戶從商,第一批商品房開放試點,第一批國內流行音樂的製作,第一代寫實電影《雅馬哈魚檔》等等,都係喺廣州出現。廣州人嘅接受能力,適應同包容能力,就係一個“生”字。當中有“生意、生財”但係唔會“生氣”。因為廣州人深信“和氣生財”呢個法則。不過,從未缺少冒險以及探索精神。所以同廣州人相處,一定唔可以死板。“執生”呢個詞就係要時間去品味嘅一個靈動、無量化嘅廣州人精神。

除咗“生”,廣州人更會“活”。廣州就係一個內地最生活便利嘅城市。二十四小時嘅飲食提供,五步就有一間便利店。親民嘅大排檔同奢華食府並存。無論你打份牛工抑或將間上市公司掌控,都有自己生活嘅空間。無論揸部“錢七”代步,抑或開住部邁巴克上路,廣州人啲攀比心理係無其他地方咁嚴重。喺廣州街頭,你會見到一個全身名牌同一個短褲拖鞋嘅搭曬膊頭好老友。因為大家崇尚“禾桿蓋珍珠”,各有各生活嘅法則。而活得舒服嘅另一個角度就係清晰定位。廣州人無首都老友、上海朋友咁辛苦嘅原因,可能就係無好多外加壓力。我從來未聽過廣州人講歷史,從未聽過有人話“當年十三行……如何輝煌”。喺面對現實嘅同時,對自己係“地主”,對自己嘅“生、活”能力有足夠信心。正因為深知自己係“主”,外人係“客”,所以會主動遷就其他地方老友,寧願自己辛苦講一口幾乎咬脷嘅普通話,都會用普通話同外地老友交流。呢個係尊重,係遷就,係廣東人嘅禮貌,係一種有自信嘅“地主”之風。

我真心中意呢個自信、內斂嘅城市。望住小北二十幾萬非洲老友,望住幾乎成個非洲啲日用品、電器、服裝等等都靠廣州攞貨出口。望住啲服裝、汽配、酒店用品、乾貨海味等等專業市場承擔住全國業務。但係,啲低調程度都幾乎被行外人遺忘廣州呢個地方。再睇睇各大媒體。可以用一個版面控訴落雨水浸內街,監督同問責啲有關部門。而嗰啲摩天大樓落成就可能半個小版面都無。呢啲先係廣州人精神,先係廣州可愛之處。廣州人追求嘅,一直都係自己喜歡、舒適便捷而唔張揚嘅生活。