长寿古寺今何在

原标题：长寿古寺今何在

广州地理

□ 贺远宁

长寿寺系广州原有嘅五大丛林之一，同华林寺、光孝寺、六榕寺、海幢寺一样咁出名。佢嘅原址系而家嘅长寿东路长寿大街。

话说明代万历三十四年(1606年)，广东巡按御史沈正隆大病之后好返，喺而家嘅长寿路一带圈地八亩，起咗一座长寿庵。到咗清代康熙年间，大汕和尚喺平南王嘅支持下，做咗长寿庵嘅住持。佢首先将长寿庵改名为长寿寺，又喺里面大兴土木，种咗好多奇花异卉。当时寺庙规模好大，有离六堂、怀古楼、绘空轩、半帆亭等等，又凿咗个大池，四围设计咗园林假山，景色唔知几靓。当时嚟呢度求神拜佛嘅善男信女络绎不绝，好多社会名流都喺呢度诗文唱酬。可惜花无百日红，后尾大汕和尚犯咗官非，被捉去坐监，最后仲死咗添，长寿寺从此一蹶不振。

到咗1905年，清朝嘅两广总督岑春煊唔同人咁品，佢强令寺产入官，于是将长寿寺拆毁，将地产拍卖，卖地得到嘅六十万银元，拨为两广师范学堂嘅办学经费。原来嘅地方就改建成乐善戏院、自来水塔、西关巡警第六分局同一啲商铺。

而家我哋去到长寿大街，睇到嘅系一个沿街摆卖嘅市场。喺长寿东街，后尾改建嘅乐善戏院因为建筑又残又烂，“文革”后已经被拆咗，起咗一座高楼，而自来水塔亦拆埋，变成自来水公司嘅宿舍大楼。唉，往日嘅一代名刹长寿寺，到而家已经连渣都冇埋，你话系唔系有啲可惜呢？