“中山九路”又会旺

原标题：“中山九路”又会旺

新闻讲：佛山市8月7日起放松楼市限购政策，其中，外地身份证可购买一套房。

阿六讲：虽然放松嘅系佛山楼市，但对广州人来讲同样系件大事。

讲“广东‘四邑’”，好多人都会知，但知唔知，其实亦有“广州‘三邑’”嘅讲法，呢“三邑”就系大家传统上中意简称嘅“南（海）番（禺）顺（德）”。呢三个地方历史上一直被视为不可分割嘅广府中心区域，当中“两邑”系属佛山，但从地理位置同血脉关系上讲，南海同广州（特别系芳村）就最亲密。

明清时期，南海县县衙就系喺宜家嘅广州越秀区旧南海县大街，而讲到宜家，广佛虽然属两个唔同城市，但地理位置挨得好近，两市相距先得20公里，有二十几条公交钱同地铁相通，南海同芳村基本上系连成一片，南海更加有广州“中山九路”之称。

由于距离近同交通方便，所以，喺楼市限购政策实施前，芳村人买南海房或者南海人买芳村房系好平常嘅事，逍遥自在享受“南海饮早茶，芳村去上班”呢种生活方式大有人在。而喺上个世纪九十年代，广州荔湾区旧城改造同起地铁，大批“西关人家”外迁，好多都选择咗去“中山九路”安居，所以，南海宜家住咗好多广州人。

宜家佛山市放松楼市限购政策，“中山九路”楼市可能又要旺。