人鬼情未了

原标题：人鬼情未了

□ 猫咪先生

某日信步游荡，路过一间电器行，传出呢只歌嘅前奏。一路听住只歌，电影情节一幕幕浮现眼前：“人生路，美梦似路长。路里风霜，风霜扑面干……”霑叔好犀利，第一句就话你知，人生路好长，一路行一路有好梦，总都要到你行完先冇梦发。有阵时，你都唔知到底眼前发生嘅事，究竟系咪梦一场。

宁采臣同小倩，一个系落魄穷书生，一个系美艳女鬼，人鬼之恋一向唔叫世俗所容，而以除魔卫道为己任嘅燕赤霞更加系认定妖魔鬼怪全部都系害人嘅衰嘢。宁采臣虽然懦弱，甚至有啲反应慢半拍，但佢就至情至性。初遇小倩嘅时候，佢虽然都被美人绝世容颜所迷，但无论佳人点投怀送抱，他就仍然发乎情止乎礼，而后为救伊人，呢个手无缚鸡之力嘅穷书生战胜自身恐惧，同蛇斗，同燕赤霞斗，之后更加同黑山老妖等法力高强嘅妖魔斗！最难得嘅系，就算知道小倩非人，亦始终不离不弃。纵然宁采臣百无一用，但情深若此，叫小倩点能够唔爱佢？

“十里平湖霜满天，寸寸青丝愁华年。对月形单望相护，只羡鸳鸯不羡仙。”呢首系宁倩两人嘅定情诗，亦系小倩内心世界嘅真实写照。你睇佢一纤纤弱质，“千里柔魂，蓬游无依”，助纣为虐绝非所愿，奈何其尸骨被姥姥控制，佢历人无数，人人为求欢娱都唔会对佢付出真心，只系贪恋其美色；惟独宁采臣一直以真心对待，坦诚相待，对佢付出最无惧嘅爱护；女子心里面最想得到嘅无非都系一个对自己爱护有加嘅人，宁采臣绝对系不二之选。

问世间情为何物，直教生死相许。直到后来，两人喺燕赤霞嘅帮助下终于消灭咗树妖姥姥、黑山老妖等妖魔，逃出生天。然而造化弄人，二人脱离苦海之时，亦系有情人生离死别之日。“不许红日教人分开，悠悠良夜不要变改……”在漆黑中抱着你，莫让朝霞漏进来。但黎明始终要来，因此朝阳一出，身为鬼魂嘅小倩只能返入金塔。此情此景，叫人情何以堪？

仲记得电影嘅最后，燕赤霞、宁采臣、聂小倩千辛万苦逃离地府返到人间，天光咗，强烈嘅阳光由窗外照入屋，宁采臣费力顶住门板为小倩遮住阳光，但系佢冇办法回头再睇一眼，两个相爱嘅人到最后只留低一句“你要保重”，到尾都系人鬼殊途阴阳两隔。相信好多人睇完出戏心里面多少会有啲遗憾。不过，都系呢个唔够完美嘅“完美”，更使得小倩一身白衣飞扬，黑发如瀑嘅空灵形象喺我哋嘅脑海之中挥之不去。