笋虾、虾碌与大头虾

原标题：笋虾、虾碌与大头虾

□ 龚慧枫

最近睇民国初年羊城首席美食家江太史后人江献珠嘅回忆录，入面提到江家嘅除夕团圆饭菜式，包括“烧肉、鸡、鸭、炆冬菇、发菜鱼丸、粉丝虾米、腊味、炆笋虾和猪肉汤等”，其他餸菜都易理解，我唯独对“炆笋虾”谂极都唔明，笋系瘦物，炆五花或者烧腩都得，但系点解会用虾嚟炆笋嘅呢？

一查资料先知道，原来笋虾唔系指竹笋同埋鲜虾，而系指笋干。笋虾系竹笋之乡肇庆广宁县嘅特产，做法系将鲜笋切开成为两片或者四片，煮熟之后晒干成为虾形嘅笋干，就称之为“笋虾”。我估计江家嘅“炆笋虾”应该系将笋干用猪肉或者排骨嚟炆，笋干吸尽肉类嘅油分，仲好食过啲肉。

唔讲唔知，广东话入面“虾”都几多，而且有啲仲有双重意思：“苏虾”既可以系指初生嘅婴儿，同时又系苏拉威西虾嘅简称；“大头虾”既可以指头部比较大嘅虾，又可以形容人成日丢三落四，做事唔上心；“虾碌”就最得意，不单可以指切成一段一段嘅柱状虾肉，仲可以指一啲令人尴尬、出糗嘅场面。

我尝试用呢几个词嚟造句：张生特别大头虾，老婆去买餐餸叫佢帮手睇屋都会虾碌嘢百出，个苏虾喊到收唔到声，道“笋虾”炆到干晒水，老婆返嚟激到扎扎跳。个人认为呢段话可以作为粤语四级考试嘅试题，问下答题人呢段话入面有几个“虾”真系指“虾”，睇怕都考起唔少人。