岭南粥文化

流花粥城到月底就要结业啦。虽然佢哋一直生意非常好，唔少街坊都中意帮衬，但公园用地要归还俾市民，所以粥城亦只好割爱了。

粥城地处繁华嘅人民北路，坐落喺风凉水冷嘅流花公园之中，本身又有鱼池绿树，风景靓，啲嘢又好食，无论招呼朋友或者宵夜食饭都好相宜。而家骤然话要撤，街坊都觉得可惜。

不过，当年佢哋准备开业嘅时候，好多人其实都心存怀疑。因为个名带“粥”字。净食粥？寡唔寡啲啊？所以，同佢嘅“兄弟”沙河粉村一样，大家对粥城都抱住观望嘅态度。好在，粥城无几耐就宾客盈门，打消咗呢啲怀疑。

其实，熟悉饮食嘅人都会知道，粥，喺岭南饮食文化之中，绝对唔会“寡”。相反，佢同文化本身一样，都具有“能容善纳”嘅特点。从最普通嘅皮蛋瘦肉，到矜贵嘅鲍参翅肚，各种食材皆可入粥。食效既能清，亦能补，花样百出，老少皆宜，两千年来早已进入千家万户。

而且，粥，亦渗入咗方言之中。老百姓对粥好熟悉，有时亦会用佢来打比方或者思考问题。比如话一个人无料到，就话佢“专煲无米粥”；话一个人有料到呢，就系“食过几晚夜粥”，比喻下过苦功，自有本事在手。

所以用“粥”来撑起一座食肆嘅门面，既有食味支持，又有文化底蕴，其实都绰绰有余。希望今次之后，粥城呢个廿几年嘅品牌，能够早日择地重开啦。