同鸡无关嘅“鸡”

原标题：同鸡无关嘅“鸡”

过多八日就系鸡年嘞。喺十二生肖当中，好多街坊都知道，“鸡”喺广州方言中用作指代、借喻率系最多嘅。不过，细究一下，大家会发现，当中有好多“鸡”其实同鸡系无关嘅。

“扣板机”广州方言叫做“摱鸡”，俗语讲“几大就几大，大炮摱鸡”（意思系：不顾一切，做了再算）。“摱鸡”唔系焖鸡之误，广州方言中“摱”系扣动嘅意思，而呢度嘅“鸡”讲嘅系“板机”。广州方言“偷鸡”同样系咁，虽然有“偷”字但并唔系讲偷盗，佢嘅意思系讲投（偷）机（鸡）取巧，“偷鸡”取嘅系近音字。

有一种违法行为叫做嫖娼，广州方言叫做“叫鸡”，之后就引伸出“做鸡”、“鸡婆”等叫法。其实，“叫鸡”两字原来系“召妓”，同鸡无关，只不过后嚟俾人慢慢演变读成“叫鸡”。呢个叫法真系冤枉咗鸡嘞。

广州人将五线谱比作“香鸡笃豆豉”，几有趣，不过呢个“香鸡”系唔食得嘅，佢系指香烧完剩番下面嗰一截，又称“香脚”，“香鸡”系转音。

此外，焫鸡（电烙铁）、擝鸡豆皮（脸上有凹凸）、吹鸡（鸣笛）、二撇鸡（八字胡）等方言， 冚唪唥都唔关鸡事。咁既然无关，点解又下下愣上“鸡”呢？呢样好难考究，但可以肯定嘅系，呢啲词句用咗“鸡”字之后，就更有俚语意味、更具广府味道。