食猪红屙……

原标题：食猪红屙……

新闻讲：最近因为多个城市空气污染严重，朋友圈盛传“吃猪血鸭血能除霾”，但经过专家考证，此属谣言。

阿六讲：先解释一下，广州人将“猪血”叫做“猪红”。

本文标题系一句广州话歇后语，由于有两个字唔系几雅，所以省略。全句系：食猪红屙黑屎——当堂见功(恭)。

呢句歇后语系形容好快有效果嘅意思。不过当初“食猪红屙黑屎”仲未成歇后语前，确系同体内除尘有关。

广州民间一直有食猪红可将吸入到肺内嘅粉尘排出嘅“偏方”。因为大家认为，食完猪红后大便就变黑，系猪红将粉尘一齐带出嘅效果。所以，一啲从事环卫、土木等行业嘅人，时不时都要食下猪红“除尘”。由于食猪红比食其他嘢更快“开大”，所以就俾人改成一句歇后语。

虽然，呢句歇后语前句有啲不雅，但后面嗰个“功”(恭)字用得相当绝妙，系点睛之笔。

其实，有关食猪红可除尘，一早就俾中西医专家否定过喇。专家们解释：之所以会“屙黑屎”系因为猪红含好多有造血作用嘅铁；而又因为猪红仲含好多有助消化嘅蛋白质，所以好快见“恭”。

食猪红虽然唔可以除尘，但佢不失为一道唔错嘅广式小食，并且有一定嘅营养价值，有啲茶楼嘅猪红汤仲属于超点，好正嘎。