揾食在秋天

原标题：揾食在秋天

中秋前后，瞓觉仲要开空调，但一场“彩虹”台风之后，广州好似立马转入秋天模式，空气凉浸浸，蓝天白云多咗，空气开始干燥，街坊开始晾席晒被，谂住好快就会有冷空气到来。

好多人都话，广州嘅秋天唔多觉，经常一日就从夏季变成冬季。其实，广州嘅秋天仲系好有存在感嘅。秋天，唔再有春季嘅回南湿笠笠，或者夏季嘅兴合合。但天干物燥，人容易热气，街坊煲汤开始讲究清润。于是乎雪梨、萝卜、莲藕、橄榄、南北杏之类就开始好卖，老人家教落，呢段时间最好少食辣嘢，多饮汤水，多食蔬菜水果。讲到水果，呢排刚好碌柚、柑橘、火龙果之类应市，啱晒街坊嘅养生之道。

除咗蔬果，秋天系广州嘅美食季节，譬如煲仔饭嘅香味，经常喺街头巷尾嘅小食店飘出来，闻到都流晒口水。煲仔饭夏天少人帮衬，皆因天气太热，身水身汗，食落冇乜味道。“秋风起，晒腊味”，“秋风起，三蛇肥”，小食店开始叫卖腊味饭，大酒楼就推出椒盐蛇碌。新鲜上市嘅南沙莲藕、花都香芋，粉嫩可口，所以唔少街坊一到秋天，就中意去郊区开“大食会”，揾间农家菜馆或者大排档，都可以食到城区少见嘅菜式。