闲话“禺山市”

原标题：闲话“禺山市”

新闻讲：前日，广州市北京路“S”形精品旅游线路正式推出。

阿六讲：新闻列咗北京路好多历史文化景点，不过，仲有一个几有历史价值嘅地方——禺山市，新闻中好似未提及，小弟借此噏番几句。

大家都知道，广州宜家有个番禺区，而熟悉广州历史嘅人仲应该知道，古时广州曾经叫做番禺。“番禺”历史系长过“广州”。咁“番禺”呢两个字又系点嚟嘅呢？

秦汉时嘅广州城有两座名山：一座叫番山，一座叫禺山（后嚟因扩城推平）。所以广州就有咗“番禺城”嘅叫法。番山喺宜家文德路中山图书馆旧址北面一带，而禺山就喺宜家嘅北京路以西，小马站以东，西湖路与越秀书院街之间。嗰一带当时就叫做禺山路，呢个名一直用到宜家，有2000几年历史。

老广州应该有啲印象，禺山路以前有个禺山市场，广州人习惯简称“禺山市”。呢个市场1920年建嘅，系广州最早嘅肉菜市场，后来拆咗。但由于佢历史够耐，所以就算冇咗，街坊仲系中意将嗰一带叫做“禺山市”。

宜家嘅北京路其实就系喺以前嘅番山同禺山之间，但从地理上划分同“贴近”性嚟睇，禺山路同北京路就亲好多，可能就因为咁，时至今日，番山冇山冇路冇“市”，而禺山虽冇山但有路有“市”。