睇餸食饭

原标题：睇餸食饭

“唔好甘铺张，要睇餸食饭先得。”小区嘅邻居王伯新屋要装修，老人家教个仔，要悭啲使钱，精打细算。广州人讲“睇餸食饭”，意思系量入为出，睇住自己嘅荷包买嘢，冇咁大个头，千祈唔好戴咁大顶帽。

前一排，有份城市奢侈品消费力排行，话广州喺全国各大城市中几乎“垫底”，京沪唔提，包括沈阳、成都对奢侈品嘅购买力都要比广州好，相比之下平民化嘅商品就热销。有啲人会话，广州毗邻港澳，啲街坊买贵嘢尽可以去香港，咁就拖低咗本地嘅消费。不过，另一份豪华车销量嘅报告就显示，无论边个品牌，北京、上海、深圳与成都都系顶级豪车嘅最大买家，譬如劳斯莱斯同兰博基尼两个牌子，广州销量都冇进入前20名。豪车嘅销量，同毗邻港澳应该冇太大关系，所以分析都话，呢种状况源于广州人“睇餸食饭”嘅使钱习惯。

老一辈嘅街坊，都食过苦，挨过穷，佢哋知道钱来得不易。不过加阵啲后生，就有啲唔同，如今“月光族”、“啃老族”常见，买嘢大手大脚。而且，加阵消费金融加上电商嘅兴盛，银行不断咁怂恿大家使未来钱，商家创造越来越便利嘅购物通道，一大笔钱，嘘声就可以花咗出去。所以，喺呢种背景下，“睇餸食饭”呢种朴素、务实嘅消费观念，就显得更加重要。◎闻歌 媒体人