沙蝉叫，荔枝熟

新闻讲：进入6月以来，荔枝开始在广州大量上市。

阿六讲：每年一到食荔枝嘅季节，广州有树木嘅地方都会听到“吱——”嘅昆虫叫声。呢种昆虫广州人多数将佢哋叫做“沙蝉”，但亦有叫“夏蝉”嘅。小弟认为叫“夏蝉”会更加准确啲，事关呢种蝉一叫就讲明夏至嚟到，广州正式开始进入热天，所以个名应该姓“夏”。

夏蝉又点解同荔枝有关呢？

广州以及珠三角一带历来就有夏至食荔枝嘅习俗，唔单止因为佢系岭南佳果好食，仲因为大家笃信食荔枝可以趋吉避凶，因此，民间一直都有“夏至食个荔，一年都冇弊”、“五月（农历）食个荔，成世冇运滞”嘅传统讲法。

荔枝属短季节水果，一年中一般就得两个月左右时间有得食下，所以要食就趁早。咁几时先有荔枝食呢？问下夏蝉啦，因为一到夏至，夏蝉就准确无误咁开始叫，而呢个时候啱啱好就系荔枝到咗收获嘅时候，可以讲，校闹钟都冇咁准。既然有咗呢个“食荔报时器”，咁大家干脆就以“沙蝉叫，荔枝熟”嚟认定食荔枝嘅最佳时间。

不过，夏蝉通常先得十几日嘅命，所以，当佢哋前赴后继咁为人“吱”完之后，就好快同大家讲“拜拜”。有句粤语歇后语叫做：沙蝉跌落地——粒声唔出。就系对夏蝉默默无闻、奉献一生嘅最好写照喇。